Vdiq regjisorja Burbuqe Berisha

Në moshën 51-vjeçare sot vdiq regjisorja Burbuqe Berisha. Lajmin për vdekjen e saj e konfirmuan bashkëpunëtorët e saj.

Siç mësohet, ish-drejtoresha e Teatrit Kombëtar ka vdekur në ambientet e Ministrisë së Kulturës.

Regjisorja Berisha u lind në Shkup, ndërsa shkollimin fillor dhe të mesëm i kreu në Prishtinë.

Studimet për regji filmi i kreu në Fakultetin e Arteve të Universitetit të Prishtinës.

Ministria e Kulturës, Rinisë dhe Sportit shkruan se sot në mesditë në Ministrinë e Kulturës papritmas ka ndërruar jetë regjisorja e filmit dhe teatrit, Burbuqe Berisha.

Jemi thellësisht të prekur nga kjo ngjarje dhe u shprehim ngushëllime familjes, miqve dhe gjithë komunitetit artistik.

Burbuqe Berisha ishte regjisore e një numri të konsiderueshëm të filmave të shkurtër, të gjatë, dokumentarë, serive televizive, shfaqjeve teatrore dhe fituese e disa shpërblimeve në festivale të filmit dhe teatrit me karakter vendor e ndërkombëtar.

Berisha në vitin 2019 mori çmimin kombëtar për kinematografi.

Ajo ka punuar si menaxhere në Kino ABC në Prishtinë,  si producente në Kosova Film, po ashtu ishte drejtoreshë e përgjithshme e Teatrit Kombëtar të Kosovës dhe anëtare e Këshillit Drejtues të QKK-së, si dhe të ansamblit “Shota”.

Së fundi ishte pjesë e përgatitjes së regjisë për koncertin inaugurues të Operës së Kosovës.