Vështirësohet bashkimi familjar për të huajt në Britani

Shqiptarët me shtetësi britanike nëse dëshirojnë të martohen me një shtetase nga vendi i tyre, ose me një të huaj tjetër që vjen të jetojë me të në Britani, duhet të sigurojnë të ardhura që kapin shifrën e 20 mijë sterlinave në vit.

Të njëjtën duhet ta bëjnë edhe prindërit që dëshirojnë të bashkohen me fëmijët e tyre.

Sipas Top Channel ka një numër shumë të madh shqiptarësh nga Shqipëria dhe Kosova që janë shtetas britanikë ose kanë familjet e tyre në vendet e origjinës ose dëshirojnë të krijojnë familje.

Me ligjet e reja për migracion, koha për të konfirmuar një lidhje të qëndrueshme martesore është zgjatur nga dy vjet në pesë vjet për të shmangur martesat e rreme.

Këto masa ndërmerren për të penguar abuzimet me përfitimet dhe ndihmat sociale që jep shteti britanik në momentin që vjen dhe jeton zyrtarisht në këtë vend.

Në këto plane pritet të ashpërsohen edhe ligjet për deportimin e personave të dënuar për krime në Britani, të cilët përdorin ligjet e për të drejtat e njeriut dhe asaj të familjes për të shmangur largimin e tyre nga territori britanik.