Veteranët i japin ultimatum qeverisë

Haradinaj i ka orientuar veteranët që të kërkojnë përgjigje nga Kuvendi i Kosovës dhe deputetët për rishqyrtimin e buxhetit

Foto ilustrim

25 tetori është dita e fundit kur veteranët e UÇK-së do të mund të presin për marrjen e pensioneve të tyre, në të kundërtën ata paralajmërojnë se do të hyjnë në grevë. Kjo është bërë e ditur pas një proteste disa orëshe që e kanë mbajtur sot dhjetra veteranë të luftës.

Fillimisht ata janë takuar me kryeministrin e Kosovës, Ramush Haradinaj, i cili u ka thënë që ai nuk ka asnjë faj, duke shtuar se obligimin e tij e ka përfunduar. Haradinaj i ka orientuar veteranët që të kërkojnë përgjigje nga Kuvendi i Kosovës dhe deputetët për rishqyrtimin e buxhetit.

Më pas ata janë drejtuar në Kuvend për t’u takuar me Kadri Veselin për të diskutuar rreth shqyrtimit të buxhetit. Por në takim i ka pritur Ilmi Ramadani, këshilltar i Kadri Veselit, i cili u ka thënë se Kuvendit i duhen 20 deri në 40 ditë për ta kaluar rishqyrtimin e buxhetit të Kosovës. Ai u ka thënë atyre se ligji do të kalojë nëpër të gjitha procedurat dhe komisionet.

Veteranët kanë akuzuar kreun e OVL-së, Hysni Gucatin, për shitjen e certifikatave të veteranëve në vlerë prej 3 mijë eurosh, ndërsa ky i fundit i ka ftuar ata që të dergojnë dëshmitë në prokurori nëse i kanë. Gucati për KTV-në tha se do të padisë veteranët që shpifjen ndaj tij.