Vetëvendosje vizitohet nga një delegacion franko-gjerman

Lëvizja Vetëvendosje është vizituar nga një delegacion franko-gjerman nga Bashkimi Evropian.

Njoftimi për takimin është dhënë në faqen e Vetëvendosjes në “Facebook”, përcjell albinfo.ch.

“Në takim u diskutua për gjendjen aktuale politiko-institucionale dhe socio-ekonomike në Kosovë, për integrimet euro-atlantike, e për raportet midis vendeve të rajonit në Ballkanin perëndimor”, thuhet në njoftim.

Përfaqësuesit e Vetëvendosjes theksuan që punësimi dhe drejtësia, përkatësisht zhvillimi ekonomik dhe sundimi i ligjit, për të gjithë e në gjithë territorin, janë vendimtare për shtetndërtimin e domosdoshëm dhe progresin aq të nevojshëm në Kosovë.

Theks i veçantë në takim iu kushtua Gjykatës Speciale dhe çështjes së demarkacionit të kufirit me Malin e Zi. U përcollën qëndrimet e mirënjohura të Lëvizjes, mbi padrejtësinë e Gjykatës, mashtrimet e Presidentit Thaçi dhe gabimet e demarkacionit me Malin e Zi.