Vetëvendosje:Kërkohet dorëheqje e qeverisë dhe zgjedhje të reja

Lëvizja Vetëvendosje ka kërkuar dorëheqjen e menjëhershme të Qeverisë së Kosovës dhe organizimin e zgjedhjeve të reja të parakohshme

Dy udhëheqësit e Lëvizjes Vetëvendosje, Albin Kurti dhe Shpend Ahemti, kanë kërkuar dorëheqjen e Qeverisë dhe shpalljen e menjëhershme të zgjedhjeve të parakohshme. 

Drejtuesit e Vetëvendosjes kanë thënë se Qeveria realisht ka heq dorë nga shteti dhe nga përmirësimi i jetës së qytetarëve të Kosovës dhe i duhet vetëm formalisht të deklarohet dorëheqja 

Disa prej arsyeve që kanë shtyrë këtë lëvizje të kërkojë dorëheqjen e Qeverisë dhe një proces të ri zgjedhor është situata e muajve të fundit, e cila sipas Vetëvendosjes, po e çon pavarësinë e vendit drejt tkurrjes. 

Albin Kurti ka deklaruar se një prej arsyeve kryesore për një kërkesë të tillë është se Qeveria e Kosovës me në krye kryeministrin Hashim Thaçi, po bëhet gati për koncesione të reja me Serbinë. 

Kurti e Ahmeti kanë përmendur bisedimet pa kushte me Serbinë, marrëveshjet për kopjen e kadastrave, të librave të amzës dhe vulat dhe tabelat e dyfishta, si disa prej arsyeve që kjo qeveri, sipas tyre, duhet të largohet nga pushteti. 

Edhe me intervenimin në veri, sipas tyre, Qeveria i ka dërguar mesazh të qartë strukturave ilegale atje se nuk është në gjendje t’u kundërvihet këtyre strukturave, edhe kur rrezikohet jeta e policëve dhe qytetarëve. 

Drejtuesit e Vetëvendosjes kanë thënë se do të përdorin të gjitha mjetet, duke nisur nga zëri në Kuvendin e Kosovës. Ata nuk kanë përjashtuar edhe organizimi jashtë institucioneve, duke përfshirë edhe protestat, për realizimin e qëllimin për largimin e Qeverisë aktuale nga pushteti. 

Sa i përket zgjedhjeve të jashtëzakonshme, ata kanë thënë se dëmet që po i shkaktohen buxhetit të Kosovës nga Qeveria aktuale, janë mijëra herë më të mëdha sesa shpenzimet që mund të krijojnë zgjedhjet.