Viktor Orbán pranon humbjen në zgjedhje, Hungaria drejt ndryshimit të madh politik

Kryeministri i Hungarisë, Viktor Orbán, ka pranuar humbjen në zgjedhjet parlamentare, duke shënuar një ndryshim të rëndësishëm politik në vend.

“Urime partisë fituese,” tha Orbán para mbështetësve të tij në Budapest. Ai shtoi se do të vazhdojë t’i shërbejë vendit edhe nga opozita: “Ne do të vazhdojmë t’i shërbejmë kombit hungarez dhe atdheut tonë, edhe nga opozita.”

Sipas raporteve fillestare të Komisionit Zgjedhor Kombëtar, partia opozitare Tisza, e udhëhequr nga Péter Magyar, ka fituar 137 vende në parlamentin me 199 deputetë. Ndërsa partia e Orbánit, Fidesz, ka siguruar 55 vende. Deri në orën 21:30 ishin numëruar rreth 66% e votave. Tisza ka marrë 53.2% të votave, ndërsa Fidesz 38%.

Pas mbylljes së vendvotimeve, Péter Magyar deklaroi optimizëm për fitoren dhe falënderoi mbështetësit e tij në Budapest. Ai tha se qeveria e ardhshme do të fokusohet në luftimin e korrupsionit dhe në zhbllokimin e fondeve të ngrira nga Bashkimi Evropian, si dhe në forcimin e marrëdhënieve të Hungarisë me BE-në dhe NATO-n, transmeton albinfo.ch.

Komisionerja e BE-së, Ursula von der Leyen, reagoi duke thënë se “Hungaria ka zgjedhur Bashkimin Evropian”, duke e cilësuar rezultatin si një sinjal të fortë pro integrimit evropian.

Zgjedhjet në Hungari pritet të sjellin një ndryshim të kursit politik të vendit, veçanërisht në raport me Bashkimin Evropian, pasi Orbán shpesh ka qenë kritik ndaj vendimeve të Brukselit.