Visar Ymeri nuk merr pjesë në mbledhjen e Këshillit të Përgjithshëm

Ai është shprehur se është në interes të partisë që problemi të zgjidhet në grupe më të vogla e në kryesi, në mënyrë që aktivistët e anëtarët të mos i ekspozohen bisedave të tilla siç ka thënë ai "aspak të këndshme e as dobiprurëse"

Kryetari i Lëvizjes Vetëvendosjes, Visar Ymeri përmes rrjetit social Facebook ka bërë të ditur se nuk do të marrë pjesë sot në mbledhjen e Këshillit të Përgjithshëm, që u thirr pas zhvillimeve të fundit që ndodhen ne VV, transmeton albinfo.ch.

“Me keqardhje ju njoftoj se nuk do të marr pjesë në mbledhjen e sotme të Këshillit të Përgjithshëm. Kjo mbledhje, edhe pse proceduralisht dhe në aspektin e statutit, nuk ka asnjë shkelje, po ndodh në një moment jashtëzakonisht të ndjeshëm për organizatën tonë. Ka më shumë se një vit që kur ballafaqohemi me disa probleme të brendshme të cilat tash së fundi, fatkeqësisht, janë bërë edhe publike e mediatike”, ka thënë Ymeri.

Ai është shprehur se është në interes të partisë që problemi të zgjidhet në grupe më të vogla e në kryesi, në mënyrë që aktivistët e anëtarët të mos i ekspozohen bisedave të tilla siç ka thënë ai “aspak të këndshme e as dobiprurëse”.

“Kam menduar që sa më shumë që të përhapet ky problem, aq më vështirë do të zgjidhet, e aq më shumë do të pësojë dëme Lëvizja VETËVENDOSJE! e uniteti në të. Prandaj edhe këtë mbledhje e shoh të ngutshme në këtë aspekt. Mbajtjen e mbledhjes në këtë situatë të tendosur, me delegatët jo të informuar mirë, ose të gjysmë informuar, e shpesh herë të keqinformuar, nuk e shoh si mënyrë për ta zgjidhur problemin. Uroj që të mos e thellojë atë”, ka shkruar Ymeri.

Ai ka thënë se kjo nguti mund t’i sjellë vetëm dëme të pariparueshme VV-së.