Vjena, nikoqire e samitit Ballkanik për migrantët

Vienna, Austria, Saturday, Sept. 24, 2016. (AP Photo/Ronald Zak)

Në Vjenë të Austrisë janë mbledhur kryeministrat e shteteve të Ballkanit dhe drejtuesit e Bashkimit Evropian, për të marr pjesë në punimet e samitit “Migrimi përgjatë rrugës Ballkanike”.

Me ftesë të Kancelarit Austriak, Christian Kern, në këtë samit përveç kryeministri shqiptar, Edi Rama, të pranishëm janë edhe kryeministri i Bullgarisë, Kroacisë, Greqisë, Hungarisë, Rumanisë, Serbisë, Maqedonisë dhe Sllovenisë.

Po ashtu, të ftuar janë edhe kancelarja gjermane, Angela Merkel, Presidenti i Këshillit Europian Donald Tusk dhe ai i Komisionit Evropian, Jean-Claude Juncker.

Në shkurtin e kaluar, në takimin e po këtij formati, organizuar poashtu në Vjenë, liderët e Ballkanit dhe Austria vendosën të mbyllin të ashtuquajturën ”rruga ballkanike”.

Greqia dhe Gjermania, që nuk morën pjesë në atë takim, patën shprehur hapur pakënaqësinë e tyre. Athina i la migrantët në mëshirë të fatit në kufirin verior të Greqisë, ndërkohë që Berlini paralajmëroi se mbyllja e kufijve nuk ishte përgjigjja për krizën e migrantëve.

Sidoqoftë, hapat e ndërmarrë nga vendet e Ballkanit çuan në reduktimin e migrantëve.

Politikat e ashpra të Hungarisë kufizuan ndjeshëm mbërritjet e migrantëve në Evropën Perëndimore.