Vlerësohet mbështetja e Zvicrës për drejtësinë në Kosovë

Zëvendëskryeministri Kuçi çmoi lartë punën që ka bërë Ambasada Zvicerane në Kosovë dhe mbështetjen që Qeveria Zvicerane ka dhënë për Ministrinë e Drejtësisë dhe për institucionet tjera

Zëvendëskryeministri i Kosovës, njëherësh ministër i Drejtësisë, Hajredin Kuçi ka pritur sot në një takim ambasadoren e Zvicrës, Krystyna Marty Lang. Në këtë takim ata kanë biseduar për marrëdhëniet ndërshtetërore Kosovë-Zvicër, për ndihmën që Qeveria Zvicerane i ka dhënë Qeverisë së Kosovës, si dhe për forcimin e këtij bashkëpunimi, bëhet e ditur në një komunikatë shtypi të Ministrisë së Drejtësisë.

Gjatë takimit me theks të veçantë u diskutua për sistemin e noterisë si një ndër projektet më të suksesshme të mbështetura nga Qeveria Zvicerane dhe zgjerimin e një partneriteti të ngjashëm edhe në fushat e tjera. 

Zëvendëskryeministri Kuçi çmoi lartë punën që ka bërë Ambasada Zvicerane në Kosovë dhe mbështetjen që Qeveria Zvicerane ka dhënë për Ministrinë e Drejtësisë dhe për institucionet tjera, përmes projekteve të shumta, si në avancimin e sistemit të noterisë, mbështetjen për Agjencinë Kosovare të Pronave, grupin ndërministror për ballafaqim me të kaluarën e shumë projekte tjera, thuhet më tutje në komunikatë.

Ambasadorja Lang nga ana e saj u shpreh shumë e kënaqur me bashkëpunimin e deritanishëm me institucionet e Kosovës, shprehu gatishmërinë dhe vullnetin e Qeverisë Zvicerane për të vazhduar mbështetjen e projekteve të tilla që kontribuojnë në avancimin e sistemit të drejtësisë së Kosovës dhe përmirësimin e jetës së qytetarëve, përfundon komunikata e dërguar nga Ministria e Drejtësisë e Qeverisë së Kosovës.