“Voice of My People” rikthen në ekran historinë e Islam Alijajt – një rrëfim mbi përfaqësimin, demokracinë dhe fuqinë e angazhimit qytetar

Dokumentari “Voice of My People”, që sjell në qendër rrugëtimin politik të deputetit zvicerano-shqiptar Islam Alijaj, u shfaq më 31 maj në kinemanë Riffraff në Cyrih, në praninë e protagonistit të filmit dhe regjisorit Nico Gerspacher, të cilët zhvilluan një bashkëbisedim me publikun pas projeksionit.

Filmi ndjek nga afër fushatën zgjedhore që e çoi Alijajn në Parlamentin Federal të Zvicrës, duke dokumentuar jo vetëm sfidat personale të një kandidati me aftësi të kufizuara fizike dhe pengesë të rëndë në të folur, por edhe procesin demokratik që qëndron pas një gare elektorale në Zvicër.

Përmes një qasjeje vëzhguese dhe autentike, dokumentari shpalos punën intensive të një fushate politike, mobilizimin e qindra mbështetësve dhe rrjetin e solidaritetit që bëri të mundur një sukses që për shumëkënd dukej i paarritshëm. Në këtë mënyrë, “Voice of My People” tejkalon dimensionin biografik dhe shndërrohet në një reflektim mbi përfaqësimin politik, barazinë e mundësive dhe pjesëmarrjen e grupeve të nënpërfaqësuara në jetën publike.

Që nga prezantimi i tij në kuadër të Zurich Film Festival (ZFF), dokumentari ka zgjuar interes të veçantë si në qarqet filmike, ashtu edhe në ato politike e sociale. Përfshirja në programin e njërit prej festivaleve më të rëndësishme të filmit në Evropën gjermanofolëse shënoi një moment të rëndësishëm për këtë projekt, duke i dhënë historisë së Islam Alijajt një audiencë më të gjerë ndërkombëtare.

Vlera e filmit qëndron pikërisht në faktin se ai nuk paraqet vetëm suksesin e një individi, por sjell një dëshmi konkrete se pjesëmarrja në demokraci nuk duhet të kufizohet nga paragjykimet, pengesat fizike apo barrierat sociale. Historia e Islam Alijajt dëshmon se përfshirja, përfaqësimi dhe barazia mund të realizohen kur ekziston vullneti qytetar dhe mbështetja e komunitetit.

Për komunitetin shqiptar në Zvicër, “Voice of My People” përfaqëson gjithashtu një histori frymëzuese integrimi dhe angazhimi publik, duke treguar se pjesëmarrja aktive në institucionet demokratike të vendit pritës është jo vetëm e mundur, por edhe e domosdoshme për një shoqëri më gjithëpërfshirëse.

Lexoni gjithashtu:

• “Voice of My People”, një vepër e përbashkët për të rrëfyer një jetë të vërtetë
  https://www.albinfo.ch/voice-of-my-people-nje-veper-e-perbashket-per-te-rrefyer-nje-jete-te-vertete/
• Filmi “Voice of My People” mbi politikanin Islam Alijaj në festivalin ZFF të Cyrihut
  https://www.albinfo.ch/filmi-voice-of-my-people-mbi-politikanin-islam-alijaj-ne-festivalin-zff-te-cyrihut/