Vrasja e trefishtë: Protestë para Gjykatës sonte në Gjilan

E kaluara kriminale e Mefail Shkodrës dhe djemve të tij, Prokuroria e Gjilanit jep detaje të reja

Vrasja e trefishtë në Gjilan që ndodhi ditë më parë ka zgjuar indinjatë qytetare për çka veçse është thirrur protestë të premten, përcjell albinfo.ch.

Mediat lokale në Gjilan njoftuan se protesta është thirrur për sot nga ora 19:00 e mbrëmjes para Gjykatës Themelore në Gjilan.

Ndërkohë që të dyshuarit Mefail Shkodra, Engjull Shkodra dhe Edonis Shkodra vazhdojnë të jenë ende në arrati pasi dyshohen se vranë babë e bir, Selman e Edmond Hasani, së bashku me familjarin e tyre Abedin Hoxhën.

Prokuroria Themelore e Gjilanit ka dhënë detaje të reja për të kaluarën e Mefial Shkodrës dhe të djemve të tij, të akuzuar për vrasjen e tre personave.

Për Mefail Shkodrën nga viti 2000 janë pranuar gjithsej 5 raste penale, ndërsa në 4 raste janë ngritur aktakuza.

“Duke marrë shkas nga raportimet lidhur me të kaluarën penale të dyshuarit Mefail Shkodra, njoftojmë opinionin publik se për atë në Prokurorinë Themelore të Gjilanit nga Policia e Kosovës që nga viti 2000 janë pranuar gjithsejt 5 raste penale, në 4 raste janë ngritur aktakuza sipas lëndëve PP.II.300/2005, PP.II.394/2011, PP.II.1091/2014, PP.I.154/17 dhe në lëndën PP.II.913/2023 është zgjidhur në procedurë të ndërmjetësimit.

Sa u përket të dyshuarve Edonis Shkodra dhe Engjëll Shkodra, ju njoftojmë se në Prokurorinë Themelore e Gjilanit, nuk ka pasur asnjë rast të proceduar, në cilësinë e të dyshuarve.

Prokuroria Themelore e Gjilanit, mbetet e përkushtuar në luftimin e kriminalitetit dhe inkurajon të gjithë qytetarët që të bashkëpunojnë me prokurorinë dhe policinë për çfarëdo informate që do të ndihmonte në hetimin e suksesshëm dhe vënien e kryesve para drejtësisë”, thuhet në njoftim.

---