Vuçiq thotë se më 15 dhjetor e bën kërkesën zyrtare për rikthimin e ushtrisë serbe në Kosovë

Presidenti i Serbisë, Aleksandër Vuçiq, vazhdon të bëjë deklarime, të cilat tensionojnë situatën në veri të Kosovës. Madje ai nuk është tërhequr as nga deklaratat e tij për të dërguar ushtarë serbë në Kosovë, edhe pse ndërkombëtarët e paralajmëruan se kjo gjë është e papranueshme, duke tensionuar kështu edhe më tej situatën në veri të Kosovës dhe marrëdhëniet e brishta mes dy vendeve.

Ai ka deklaruar se më 15 dhjetor do t’i dërgojë kërkesë komandantit të misionit të NATO-s në Kosovë, KFOR, për të dërguar deri në 1.000 forca të sigurisë në Kosovë.

Mediat serbe kanë zbardhur një pjesë të letrës që qeveria serbe do t’i dërgojë KFOR-it për të lejuar ushtarët e saj të vendosen në Kosovës, sipas shkresës së rezolutës aktuale 1244.

Në kërkesë janë të detajuara arsyet pse, sipas Serbisë, është e nevojshme ardhja e forcave të sigurisë serbe, ndërsa bashkë me dokumentin komandantit të misionit ndërkombëtar ushtarak Angjel Rustuci, i janë dërguar edhe gjashtë bashkëngjitje të detajuara me të dhëna për “cenueshmërinë” e serbëve në veri.