Vujanoviq: Demarkacioni për ne ka përfunduar

“Sa i takon ratifikimit të marrëveshjes së Demarkacionit me Kosovën, ne kemi përcaktuar qëndrimin tonë shtetëror. Kjo marrëveshje është e mbyllur"

Presidenti i Malit të Zi, Filip Vujanoviq, ka përsëritur se për ta çështja e demarkacionit është temë e mbyllur. Në takim me presidentin shqiptar Ilir Meta, Vujanoviq ka thënë se me durim po presin që këtë çështje ta zgjidhë Kosova, transmeton albinfo.ch.

“Sa i takon ratifikimit të marrëveshjes së Demarkacionit me Kosovën, ne kemi përcaktuar qëndrimin tonë shtetëror. Kjo marrëveshje është e mbyllur. Pas një komunikimi të mirë mes dy qeverive është nënshkruar në Vjenë, është ratifikuar në Mal të Zi. Brukseli ratifikimin e kësaj marrëveshjeje e ka vendosur kusht për vizat e Kosovës. Duam që të liberalizohen sa më parë vizat dhe këto probleme në Kosovë të zgjidhen sa më parë dhe sa më mirë” ka thënë Vujanoviq.

Për këtë çështje ka folur edhe presidenti Meta, i cili tha se dëshirojnë të shohin një vullnet të plotë në Kosovë mes gjithë faktorëve për të ecur përpara në këtë çështje. “Është në interes të dy vendeve, por në mënyrë të veçantë në interes të Kosovës, që për fat të keq, zgjidhjen e kësaj çështjeje e ka të kushtëzuar dhe me liberalizimin e vizave të BE-së,” ka thënë Meta.