VV: Kjo Qeveri e ky Kuvend s’e kanë legjitimitetin të bëjnë reformë

Partitë në pushtet janë shprehur për reformë zgjedhore, por Vetëvendosje është kategorikisht kundër që në këtë situatë të nisë puna për reformën.

Albulena Haxhiu ka thënë se kjo është çështje që më së shumti është keqpërdorur nga partitë politike për t’i shtuar jetën qeverisë.

“Vetëvendosje nuk është që në këto rrethana të bëjë reformë. Kjo Qeveri, ky Kuvend nuk e ka legjitimitetin të bëjë reformë. Mua po më duket që vënia në diskutim e kësaj teme është që veç t’i shtojë jetën qeverisë. Vetëvendosje do që vendi të shkojë në zgjedhje”, ka thënë Haxhiu, përcjell albinfo.ch.

Ahmet Isufi i AAK-së ka thënë se ata janë për reformë, sepse sa më shumë përsoset sistemi zgjedhor, më të mira dalin zgjedhjet. “Edhe Nisma është pro reformës zgjedhore”, ka thënë Enver Hoti.

Ai ka deklaruar se pikërisht tash është momenti i duhur kur duhet të ndodhë reforma, meqë koalicioni qeverisës është veç në vitin e parë të qeverisjes. Arsim Bajrami nga PDK-ja ka thënë se reforma zgjedhore është domosdoshmëri.

Ndërsa Anita Schuluchter Roth nga Ambasada e Zvicrës në Kosovë tha se është thelbësore që shoqëria civile të ketë një zë të unifikuar lidhur me modifikimet teknike të sistemit të zgjedhjeve. Këto komente u bënë në tryezën e organizuar nga Instituti Demokraci për Zhvillim dhe Ambasada zvicerane.