Westerwelle dhe Hague kërkojnë respektim të kufijve të Kosovës

Kryediplomati gjerman, Guiodo Westerwelle dhe sekretari i punëve të jashtme të Britanisë së Madhe, William Hague kanë botuar një koment në gazetën me renome gjermane “Frankfurt Allgemeine Zeitung” nëpërmjet të cilit kërkojnë nga Beogradi dhe Prishtina që të gjejnë një zgjidhje që i respekton kufijtë e Kosovës dhe i lëviz dy vendet, Kosovën dhe Serbinë drejt anëtarësimit në BE.

Komenti i tyre u publikua pas takimit që Westerwelle dhe Hague zhvilluan të dielën. Ministri i Jashtëm Gjerman, Westerwelle do ta vizitojë të enjten Kosovën ku pritet të takohet me Kryeministrin e Kosovës, Hashim Thaçi dhe komandantin e KFOR-it, Erhard Buhler. Kryediplomati Westerwelle do ta bëjë një udhëtim me helikopter mbi veriun e Kosovës, ndërsa në vizitën tri ditëshe në Ballkan, do ta vizitojë edhe Kroacinë dhe Malin e Zi.