Xherdan Shaqiri: Po flitet shumë për gjëra jashtë futbollit

Shaqiri theksoi se në një turne të madh si Kupa e Botës, lojtarët dhe stafi duhet të përqendrohen te futbolli dhe jo te debatet që krijohen rreth ekipit

Legjenda e futbollit zviceran, Xherdan Shaqiri, ka komentuar situatën rreth kombëtares së Zvicrës në Botërorin 2026, duke vlerësuar se vëmendja është zhvendosur nga futbolli te temat dytësore.

Ish-ylli i Zvicrës tha se rreth ekipit kombëtar po flitet shumë për çështje jashtë fushës, ndërsa fokusi duhet të jetë te paraqitjet dhe rezultatet në Botëror.

Sipas tij, skuadra ka cilësi të mjaftueshme për të reaguar pas hapit fals në ndeshjen e parë, shkruan Blick, transmeton albinfo.ch.

Shaqiri theksoi se në një turne të madh si Kupa e Botës, lojtarët dhe stafi duhet të përqendrohen te futbolli dhe jo te debatet që krijohen rreth ekipit. Ai beson se atmosfera mund të ndryshojë shpejt nëse Zvicra arrin një rezultat pozitiv në ndeshjen e ardhshme.

Komentet e tij vijnë në një moment kur kombëtarja zvicerane po përballet me kritika pas barazimit 1:1 ndaj Katarit, ndërsa kapiteni Granit Xhaka ka kërkuar gjithashtu më shumë përqendrim dhe përgjegjësi nga skuadra.

Ndeshja e ardhshme ndaj Bosnjës konsiderohet vendimtare për shanset e Zvicrës për t’u kualifikuar në fazën eliminatore të Botërorit.

---