Zbardhet motivi i vrasjes në Skenderaj dhe plagosjes së dyfishtë

Ilustrim

Blerja e një telefoni dyshohet të jetë motivi i vrasjes të së premtes të një gruaje në një fshat të Skenderajt. “Kallxo.com” ka siguruar një raport zyrtar të Policisë i cili flet për motivin që e shtynë Xh.T. të qëllojë për vdekje gruan e tij dhe plagosë baxhanakun dhe gruan e tij, përcjell albinfo.ch.

I dyshuari Xh.T. kishte deklaruar në polici se kishte një mosmarrëveshje me baxhanakun e tij për shkak të një telefoni. Çifti D.S. dhe F.S. (motra e gruas së të dyshuarit) pretendohet se i kishin blerë një telefon celular gruas së dorasit.

“Për shkak të kësaj, i dyshuari Xh.T. e kishte thirrur në telefon D.S. dhe e kishin lënë të takoheshin në Runik. D.S. ka dalë në takim me bashkëshorten e tij, F.S.”, thuhet në dokumentin e Policisë. I njëjti sqaron se në momentin e takimit i dyshuari e kishte thyer xhamin e veturës me pushkë “Dhjetëshe” ka shtënë në drejtim të viktimave D.S. e F.S., duke i plagosur të dy.

I dyshuari menjëherë është kthyer nga Runiku në Radishevë ku edhe banon, e ka nxjerrë bashkëshorten në oborr dhe e ka vrarë, dyshohet me të njëjtën armë.

Sipas këtyre informacioneve të besueshme, në Emergjencën e Skenderajt ishin dërguar tre persona të plagosur me armë zjarri dhe se si pasojë e plagëve F.T. kishte vdekur.

Ndërsa, i plagosur D.S. fillimisht ishte dërguar në Spitalin Rajonal të Mitrovicës e më pas në QKUK, në Prishtinë. Kurse, bashkëshortja e D.S., F.S., që është motra e F.T., ishte dërguar në QKUK.

I dyshuari është arrestuar dhe është sjellë në stacionin e Skenderajt bashkë me armën me të cilën dyshohet se ka kryer veprat penale.