Zgjerohen ndalimet e pirjes së duhanit edhe në hapësira të hapura në Zvicër

pixabay

Në Zvicër po shtohen gjithnjë e më shumë ndalimet për pirjen e duhanit, duke mos u kufizuar vetëm në ambientet e mbyllura, por edhe në hapësira publike të jashtme.

Në qytetin e St. Gallenit, votuesit kanë miratuar ndalimin e pirjes së duhanit në të gjitha këndet komunale të lojërave. Ndërkohë, edhe në shumë vende të tjera po vendosen rregulla të ngjashme, si në pishina publike dhe pranë hyrjeve të stacioneve hekurudhore. Në disa pishina, si ajo në Herzogenbuchsee, pirja e duhanit lejohet vetëm në zona të caktuara.

Autoritetet dhe ekspertët e shëndetit publik theksojnë se qëllimi i këtyre masave është mbrojtja e qytetarëve, veçanërisht e fëmijëve, nga tymi pasiv. Megjithatë, studiuesit thonë se nuk ka prova të qarta që këto zona e ulin drejtpërdrejt konsumin e duhanit, por ato mund ta bëjnë pirjen e duhanit më pak të lehtë dhe të nxisin lënien e tij, transmeton albinfo.ch.

Sipas organizatave shëndetësore, Zvicra ende ka rregulla më të buta krahasuar me disa vende evropiane, ku ndalimet janë më të ashpra edhe në automjete private apo në tarraca restorantesh.

Në përgjithësi, tendenca në vend është drejt zgjerimit të hapësirave pa duhan, si pjesë e politikave për mbrojtjen e shëndetit publik.