Zjarr i madh në Zvicër: Pesë persona të zhdukur dhe tetë të lënduar

Cantonal Police of Graubünden

Një zjarr i madh ka përfshirë gjatë natës një ndërtesë banimi në Thusis, në kantonin Graubünden të Zvicrës, duke lënë pesë persona të zhdukur dhe tetë të tjerë të lënduar.

Sipas Policisë Kantonale të Graubündenit, zjarri shpërtheu gjatë natës mes së enjtes dhe së premtes në një ndërtesë ku ndodheshin një restorant dhe disa apartamente. Autoritetet u njoftuan për zjarrin pak pas mesnatës.

Në operacionin për shuarjen e zjarrit janë angazhuar rreth 100 pjesëtarë të ekipeve emergjente nga disa brigada zjarrfikëse të rajonit. Sipas të dhënave paraprake, zjarri dyshohet se ka nisur në katin e dytë të ndërtesës.

Situata është komplikuar edhe më shumë pasi shkallët e ndërtesës janë shembur. Për këtë arsye, ekipet emergjente janë detyruar të hapin çatinë me ndihmën e një vinçi për të vazhduar ndërhyrjen.

Katërmbëdhjetë persona arritën të largoheshin nga ndërtesa. Tetë prej tyre pësuan lëndime: dy janë në gjendje të rëndë, dy kanë lëndime të shkallës së mesme, ndërsa katër të tjerë kanë marrë lëndime të lehta.

Të lënduarit morën trajtim emergjent në vendngjarje dhe më pas u dërguan në spitale në Chur, Thusis, Ilanz dhe Cyrih. Në operacion u përfshi edhe një ekip i shpëtimit ajror Rega.

Ndërkohë, pesë persona vazhdojnë të konsiderohen të zhdukur, ndërsa operacioni i autoriteteve në vendngjarje po vazhdon.

Policia Kantonale dhe Prokuroria Publike kanë nisur hetimet për të përcaktuar shkaqet dhe rrethanat e zjarrit. Deri më tani, autoritetet nuk kanë bërë të ditur se çfarë mund ta ketë shkaktuar atë.