Zjarret në jugperëndim të Francës detyrojnë evakuimin e rreth 20 mijë personave

Ilustrim, Agjencia e Menaxhimit Emergjent

Rreth 20 mijë banorë dhe vizitorë janë detyruar të largohen nga zonat e prekura nga zjarret masive në rajonin e Girondës, në jugperëndim të Francës.

Sipas autoriteteve lokale, rreth 12 mijë persona tashmë janë evakuuar, ndërsa për afro 8 mijë e 800 të tjerë po zhvillohen operacionet e zhvendosjes si masë sigurie. Flakët kanë përfshirë zonën pranë Gjirit të Arcachon, ku deri tani janë djegur rreth 3 mijë e 400 hektarë tokë.

Mbi 700 zjarrfikës janë angazhuar në përpjekjet për vënien nën kontroll të zjarrit, ndërsa ekipet e emergjencës po përballen me kushte të vështira për shkak të temperaturave të larta dhe erërave të forta.

Një pjesë e madhe e personave të evakuuar ishin turistë që qëndronin në kampingje në gadishullin Lège-Cap-Ferret. Autoritetet kanë urdhëruar largimin e tyre për të shmangur rrezikun nga përhapja e mëtejshme e flakëve.

Prefektja e Girondës, Sophie Brocas, bëri të ditur se evakuimet janë kryer pa probleme dhe se deri tani nuk janë raportuar persona të lënduar. Ndërkohë, disa rrugë dhe zona pyjore janë mbyllur për shkak të rrezikut.

Shefi i zjarrfikësve të Girondës, Marc Vermeulen, deklaroi se ekipet kanë punuar pa ndërprerje gjatë gjithë natës, por paralajmëroi se situata mbetet e paparashikueshme për shkak të ndryshimeve të motit.

Zjarre të mëdha janë raportuar ditëve të fundit edhe në Spanjë dhe Itali. Në Spanjë janë evakuuar banorë pranë Toledos, ndërsa në Siçili një zjarrfikës humbi jetën gjatë ndërhyrjes në një vatër zjarri.

Ndërkohë, më herët gjatë kësaj jave, dy zjarrfikës francezë humbën jetën duke luftuar një tjetër zjarr pranë aeroportit të Bordosë.