Zvicër: Asnjë gjurmë e toksinës cereulide në analizat e ushqimeve për foshnja

@unsplash

Autoritetet zvicerane kanë bërë të ditur se nuk është zbuluar asnjë gjurmë e toksinës cereulide në produktet për foshnja të testuara pas skandalit të qumështit të kontaminuar që çoi në tërheqje produktesh në dhjetëra vende.

Testimet u kryen nga Zyra Federale për Sigurinë Ushqimore (FSVO) gjatë muajve mars dhe prill në pesë kantone të Zvicrës. Rreth 30 mostra të qumështit pluhur, ushqimeve me bazë drithërash, snacks-ve të misrit dhe makaronave u analizuan dhe të gjitha rezultuan negative.

Megjithatë, ekspertët kanë ngritur pikëpyetje lidhur me numrin e kufizuar të mostrave dhe pjesëmarrjen e vetëm pesë kantoneve në këtë fushatë kontrolli, transmeton albinfo.ch.

Autoritetet sqaruan se testimet ishin planifikuar fillimisht për kontrollin e substancave të tjera potencialisht të rrezikshme, por më pas u zgjeruan për të përfshirë edhe cereuliden pas skandalit ndërkombëtar të formulave për foshnja.