Zvicër: Dita Kombëtare kundër miteve mbi alkoolin, synohet ulja e stigmatizimit

Në Zvicër, rreth 16% e popullsisë raportohet të ketë konsum problematik të alkoolit, ndërsa rreth 250 mijë persona vlerësohen si të varur. Megjithatë, shumë prej tyre nuk kërkojnë ndihmë me kohë, kryesisht për shkak të stigmatizimit dhe paragjykimeve shoqërore, sipas organizatave zvicerane për parandalimin e varësive.

Më 21 maj u shënua Dita Kombëtare për Problemet e lidhura me Alkoolin, e cila synon të rrisë ndërgjegjësimin, të sfidojë mitet dhe të nxisë një qasje më mbështetëse ndaj personave të prekur dhe familjeve të tyre. Fushata organizohet nga disa institucione dhe organizata zvicerane që merren me varësitë, përfshirë Shoqatën Zvicerane për Varësitë dhe Kryqin Blu Zviceran.

Organizatorët theksojnë se një nga pengesat kryesore për trajtim është perceptimi se varësia është thjesht dobësi personale ose mungesë vullneti. Sipas tyre, varësia lidhet me faktorë kompleksë, përfshirë gjenetikën, mjedisin social dhe ndryshimet neurobiologjike që ndikon alkooli në tru, duke prekur sistemet e shpërblimit dhe kontrollit të impulseve.

Ekspertët paralajmërojnë se këto paragjykime shpesh e shtyjnë personin e prekur drejt izolimit dhe vonojnë trajtimin, ndërsa theksojnë rëndësinë e ndërhyrjes së hershme dhe mbështetjes profesionale.