Zvicër: Iniciativë që synon të ulë konsumin e mishit

pixabay

Një iniciativë që synon ndryshimin e mënyrës së ushqyerjes në Zvicër do të hidhet në votim më 27 shtator. Nisma “Për ushqim të sigurt” propozon më shumë prodhim dhe konsum të ushqimeve me bazë bimore, ndërsa sektori bujqësor e kundërshton, duke e cilësuar si një “diktat vegan”.

Konsumi i mishit dhe produkteve të qumështit mbetet i lartë në Zvicër. Sipas të dhënave të cituara nga RTS, një banor konsumon mesatarisht mbi 20 kilogramë djathë në vit dhe afro një kilogram mish në javë.

Sociologia Marlyne Sahakian nga Universiteti i Gjenevës thotë se ndryshimi i këtyre zakoneve nuk është i lehtë, pasi ushqimi lidhet edhe me traditat familjare dhe normat kulturore.

Ajo thekson se qytetarët kanë nevojë për më shumë mbështetje praktike për të mësuar mënyra të reja gatimi dhe për të përfshirë më shumë produkte bimore në dietën e tyre.

Një eksperiment i zhvilluar në Gjenevë në vitin 2021, ku rreth 50 familje reduktuan konsumin e mishit dhe rritën atë të perimeve për një muaj, tregoi se familjet me katër anëtarë mund të kursenin 60 deri në 100 franga në javë.

Iniciativa synon të ndryshojë jo vetëm zakonet e konsumatorëve, por edhe sistemin agro-ushqimor të Zvicrës, duke nxitur një prodhim më të orientuar drejt ushqimeve me bazë bimore.