Zvicër: Një person humb parakrahun nga shpërthimi i fishekzjarrëve

36-vjeçari po rregullonte fishekzjarrët, të cilat më pas kanë shpërthyer. Ai ka mbetur i lënduar edhe në fytyrë dhe në pjesën tjetër të trupit

Disa persona janë lënduar nga fishekzjarrët në Zvicër natën e ndërrimit të viteve.

Kështu, në Rorschacherberg (St. Gallen), një burrë ka humbur parakrahun e majtë, si pasojë e shpërthimit të fishekzjarrëve, përcjell albinfo.ch. Sipas policisë, 36-vjeçari po rregullonte fishekzjarrët, të cilat më pas kanë shpërthyer. Ai ka mbetur i lënduar edhe në fytyrë dhe në pjesën tjetër të trupit.
I dëmtuari u desh të dërgohej në spital nga shërbimet e urgjencës, me lëndime të rënda.

Aksidenti ka ndodhur pak para orës 12:40 në Rorschacherberg SG, siç njoftoi policia kantonale e St. Gallenit, në ditën e parë të Vitit të Ri.

Ndërkq në Wattwil (SG), njerëz të panjohur kanë shpërthyer fishekzjarre në turmë gjatë një feste në Markthalle. Tetë persona kanë pësuar plagë, shkruan sda.ch.

Në Saas-Fee/VS, katër persona janë plagosur pasi një fishekzjarre ka shpërthyer në një turmë njerëzish. Një vajzë ka pësuar djegie të rënda. Një 18-vjeçar është arrestuar për zbardhjen e rrethanave të ngjarjes, ka njoftuar policia.

Sipas policisë kantonale të Valisit, kjo e fundit, një vajzë 14 vjeçare, me shtetësi të huaj, është dërguar në spitalin CHUV në Lozanë me djegie të rënda.

Në Hohenrain të Lucernit, një adoleshent u plagos rëndë në një aksident me fishekzjarrë. 15-vjeçari donte të ndezte një raketë të disponueshme në treg, përcjell albinfo.ch. Për arsye ende të paqarta, raketa ka shpërthyer në tokë.

Adoleshenti ka pësuar lëndime të rënda dhe është dërguar në spital me helikopter të shpëtimit. Po vijojnë hetimet për sqarimin e shkaqeve të aksidentit.

---