Zvicër: Peticioni i biodiversitetit, i nënshkruar nga më shumë se 40,000 njerëz

@pixabay

Përfaqësuesit e 44 organizatave për mbrojtjen e mjedisit u kanë kërkuar parlamentarëve të veprojnë dhe të mbrojnë biodiversitetin e Zvicrës. Të hënën, këto organizata dorëzuan një peticion me më shumë se 43,000 nënshkrime në kryeqytetin zviceran, Bernë, përcjell albinfo.ch.

Të martën Senati do të mblidhet dhe do të shqyrtojë një rishikim të ligjeve në lidhje me mbrojtjen e natyrës. Prandaj, politikanët do të duhet të vendosin nëse do të hyjnë në një debat mbi krizën e biodiversitetit dhe nëse dëshirojnë të zhvillojnë një kundërprojekt për të luftuar shpejt dhe në mënyrë efektive kundër krizës gjithnjë e më të përkeqësuar të biodiversitetit, thonë organizatat.

“Zvicra po përjeton një krizë akute të biodiversitetit, e ilustruar nga disa nga listat e kuqe më të gjata të të gjitha vendeve të industrializuara. Prandaj, ne duhet të intensifikojmë përpjekjet tona për të ruajtur burimin tonë të jetës,” kërkoi Raffael Ayé, drejtor i BirdLife Switzerland, cituar në një konferencë për shtyp. Termi “lista e kuqe” është bërë gjithnjë e më popullor vitet e fundit kur u referohet specieve të cenueshme dhe të rrezikuara.

Në Zvicër afërsisht 35% e të gjitha specieve bimore dhe shtazore ose aktualisht përballen me kërcënimin e zhdukjes ose tashmë janë zhdukur. Format e jetës ujore janë veçanërisht të prekura.

“Deri në dy të tretat e të gjitha llojeve të peshkut autokton janë në listën e kuqe! Ne duhet të mbrojmë liqenet, përrenjtë dhe lumenjtë tanë, të cilët tashmë janë në gjendje kritike”, tha David Bittner, administrator i Federatës Zvicerane të Peshkimit, përcjell albinfo.ch.

Nënshkruesit përfshijnë mbi 10,000 fëmijë, thanë organizatorët e peticionit, i cili u parashtrua saktësisht 31 vjet pasi qeveria zvicerane nënshkroi Konventën mbi Diversitetin Biologjik në Rio de Zhaneiro.