Zvicër: Shërbimi Federal i Inteligjencës po monitoron 44 persona të rrezikshëm

(KEYSTONE/Christian Beutler)

Shërbimi Federal i Inteligjencës (NDB) në Zvicër aktualisht po mbikëqyr 44 të ashtuquajtur “persona me rrezik”, të cilët konsiderohen si kërcënim për sigurinë e brendshme dhe të jashtme të vendit.

Sipas Këshillit Federal, një numër i vogël njëshifror i këtyre personave aktualisht kanë status azili në Zvicër. Në raportin e fundit të publikuar nga shërbimi i inteligjencës, në nëntor të vitit të kaluar ishin regjistruar 46 persona me rrezik, që do të thotë se numri ka rënë lehtë.

NDB publikon rregullisht të dhëna mbi rastet që trajton në kuadër të misionit të tij kundër terrorizmit. Këto raste përfshijnë individë që konsiderohen me rrezik të shtuar për sigurinë e Zvicrës.

Sipas autoriteteve, shumica e këtyre personave jetojnë prej shumë vitesh në Zvicër. Kategoritë përfshijnë si individë të radikalizuar me motive xhihadiste, ashtu edhe persona që mbështesin apo nxisin forma të tjera të terrorizmit.

Që nga qershori 2026, NDB ka regjistruar gjithsej 44 persona në këtë kategori. Shërbimi i inteligjencës bashkëpunon vazhdimisht me Policinë Federale (Fedpol) dhe Prokurorinë Federale, të cilave u përcjell të gjitha rastet relevante.

Sipas Këshillit Federal, autoritetet kantonale dhe federale ndërmarrin masa parandaluese në këto raste, si mbledhja dhe vlerësimi i informatave, monitorimi, paralajmërimet parandaluese, sinjalizimet në sistemet e kërkimit, si dhe kërkesat për dëbime apo ndalime hyrjeje në vend.