Zvicêr: Si do të kufizohen reklamat e ushqimeve të pashëndetshme për fëmijët?

Qeveria e Zvicrës ka propozuar një plan vetërregullimi që synon të kufizojë reklamat e ushqimeve me shumë sheqer, yndyrë dhe kripë, të drejtuara për fëmijët nën 13 vjeç. Masa synon të mbrojë fëmijët nga ndikimi i marketingut të produkteve si çokollatat, patatinat dhe pijet e ëmbla.

Sipas Zyrës Federale për Sigurinë Ushqimore dhe Veterinarinë (FSVO), reklamat për këto produkte duhet të hiqen nga hapësirat ku fëmijët ekspozohen më së shumti, përfshirë shkollat, televizionin, internetin, rrjetet sociale dhe lojërat online.

Plani kërkon që industria ushqimore dhe ajo e reklamave të zbatojnë vetërregullim të bazuar në kriteret ushqimore të Organizatës Botërore të Shëndetësisë (OBSH), ndërsa procesi do të mbikëqyret nga autoritetet federale, transmeton albinfo.ch.

Industria ka afat deri në mes të korrikut për të vendosur nëse do të marrë pjesë në këtë nismë.

Autoritetet zvicerane theksojnë se reklamat e ushqimeve të pashëndetshme ndikojnë në zakonet e të ushqyerit të fëmijëve. Aktualisht, rreth një në pesë fëmijë në Zvicër është mbipeshë ose obez, duke rritur rrezikun për sëmundje kronike në të ardhmen.