“Zviceranët e jashtëm”, telashe me hapjen e llogarive bankare në Zvicër

Që nga koha e krizës financiare botërore, për ta është bërë më e vështirë të hapet një llogari në ndonjërën nga bankat zvicerane

Keystone

Në kongresin e diasporës zvicerane (Auslandschweizer) që po mbahet në Bazel, ka marrë pjesë ministri federal, Alain Berset. Me këtë rast ai siguruar bashkatdhetarët e tij që jetojnë jashtë vendit se Këshilli Federal (qeveria) është duke e ndjekur problematikën rreth llogarive bankare të tyre dhe se është duke u synuar një zgjidhje e përshtatshme e problemit.

Berset ka treguar mirëkuptim për shqetësimet e “zviceranëve të jashtëm”, shkruan srf.ch. Që nga koha e krizës financiare botërore, pra nga viti 2008 e tutje, për ta është bërë më e vështirë të hapet një llogari në ndonjërën nga bankat zvicerane, transmeton albinfo.ch. Shpeshherë për të realizuar një gjë të tillë duhen paguar taksa më të larta.

Në të njëjtën kohë Berset ka sinjalizuar për më shumë vetëpërmbajtje. Jo më parë se të mërkurën e kaluar, Këshilli Federal ka hedhur poshtë një kërkesë nga Dhoma e Kantoneve, e cila synonte që pjesëtarët e diasporës zvicerane të kenë të garantuar hapjen e një llogarie në njërën nga bankat relevante zvicerane.