Zviceranët kanë dhënë 2 miliardë franga më pak për blerje jashtë vendit

Gjatë kohës së bllokimit, shitësit zviceranë të ushqimit kanë përfituar shumë, veçanërisht ata në rajonet rurale

Afërsisht për 13 javë, zviceranët dhe banorët tjerë të Zvicrës, për shkak të kufizimeve të pandemisë, nuk ishin në gjendje të blinin përtej kufirit.

Banka zvicerane Credit Suisse tani ka vlerësuar se rënia e “shopping turizmit” për arsyen e përmendur, në vendet fqinje ka bërë që zviceranët të shpenzojnë rreth 2 miliardë franga më pak.

Gjatë kohës së bllokimit, shitësit zviceranë të ushqimit kanë përfituar shumë, veçanërisht ata në rajonet rurale, thuhet në vlerësimin e Credit Suisse, transmeton albinfo.ch.

Midis marsit dhe qershorit të vitit 2020, shpenzimet për “ushqim dhe produkte të përafërta me atoushqimore” (“Food- und Near-Food-Produkte”) janë rritur më fuqishëm në rajonet rurale se sa në ato urbane, në krahasim me një vit më parë.

Zonat urbane, nga ana tjetër, kanë “hise” më të vogël në vëllimin e rritur të tregtisë së përmendur, përcjell albinfo.ch. Arsyet e dhëna në studimin e bankës së përmendur janë: konkurrenca më e madhe, për shembull ajo në sferën e shërbimeve të dërgimit të ushqimeve, si dhe ndryshimet në flukset e udhëtarëve. Dhe, së fundi, edhe ndryshimet përkatëse në sjelljet e konsumatorëve.

---