Zviceranët me prejardhje të huaj, dy herë më shumë të papunë se vendësit

Shkalla e papunësisë është 7 për qind për njerëzit me prejardhje migrimi - pavarësisht brezit - krahasuar me 3 për qind për ata që nuk kanë prejardhje të tillë

Në vitin 2020, 38 për qind e popullsisë me rezidente të Zvicrës, e moshës mbi 15 vjeçare, kishte prejardhje të huaj. Kjo është 0.3 pikë përqindje më shumë se një vit më parë.

Por, shkalla e tyre e papunësisë është më shumë se dy herë më e lartë se ajo e popullsisë që nuk ka sfond migrimi, transmeton albinfo.ch. Ajo është 7 për qind për njerëzit me prejardhje migrimi – pavarësisht brezit – krahasuar me 3 për qind për ata që nuk kanë prejardhje të tillë.

Megjithatë, pasi emigrantët të kenë gjetur një punë, shanset e tyre për avancim duket të jenë pak a shumë të solide: Kështu, kuota e punonjësve me funksione drejtuese është vetëm pak më e ulët se ajo e njerëzve pa sfond migrimi: 32 për qind për gjeneratën e parë dhe 33. për qind për të dytën, krahasuar me 35 për qind për punonjësit pa sfond migrimi, shkruan sda.ch.

Megjithatë, personat ekonomikisht aktivë që kanë sfond migrimi të gjeneratës së parë kanë shumë më shumë gjasa të jenë të mbikualifikuar se ata pa këtë sfond: 19 përqind e atyre që kanë lindur jashtë vendit punojnë në punë që nuk përkojnë plotësisht  me nivelin e tyre të arsimimit, transmeton albinfo.ch. Në rastin e personave ekonomikisht aktivë pa sfond migrimi, kjo ndodh vetëm në masën prej 12 për qind.

Zyra Federale e Statistikave (BFS), e cila i ka publikuar këto shifra të martën, paralajmëron që të mos konsiderohet historia e migracionit si faktori i vetëm shpjegues për dallimet midis këtyre grupeve. Faktorë të tjerë si mosha ose niveli i arsimimit mund të kenë gjithashtu një ndikim në këtë drejtim.

---