Zvicra do të ndihmojë Bankën e Shqipërisë

Ilustrim

Sekretariati i Shtetit Zviceran për Çështjet Ekonomike do të ndihmojë Bankën e Shqipërisë në përsosjen e analizës, vendimmarrje dhe procesin e politikëbërjes, raportojnë mediat në Tiranë, përcjell albinfo.ch.

Guvernatori i Bankës Qendrore, Gent Sejko, nënshkroi një memorandum mirëkuptimi me ambasadorin e Zvicrës në vendin tonë, Adrian Maitre.

Kjo marrëveshje, u shpreh Sejko, vjen pas mbylljes së një bashkëpunimi të suksesshëm në periudhën 2013-2018, që solli një përmirësim të dukshëm të punës analitike, kërkuese dhe teknike të Bankës së Shqipërisë.

Guvernatori theksoi se rezultatet e këtij projekti kanë qenë frytdhënëse në fushën e zbatimit të politikës monetare, mbikëqyrjes bankare, stabilitetit financiar dhe sistemit të pagesave.

Ndërsa ambasadori i Zvicrës u shpreh se “Shqipëria ka nevojë për institucione të efektshme në të gjitha fushat dhe në të gjitha nivelet. Unë do ta konsideroja Bankën e Shqipërisë si një institucion të tillë.” Programi i ri do të realizohet nëpërmjet misioneve të ekspertëve, kurseve online, workshopeve teknike dhe vizitave të punës ne fusha si menaxhimi i burimeve njerëzore apo vijueshmëria e biznesit në kohë krize.