Zvicra do ta bëjë internetin tetë herë më të shpejtë se sot

Kjo hyn në fuqi në vitin 2024. Është vendosur gjithashtu një kufi çmimi. Qasja më e shpejtë në internet duhet të kushtojë maksimumi 60 franga në muaj

Shpejtësia e internetit në shërbimin bazik zviceran do të rritet tetëfish. Këshilli Federal miratoi të premten rishikimin përkatës të Urdhëresës për Shërbimet e Telekomunikacionit, transmeton albinfo.ch. Kështu, nga viti 2024, do të garantohet një shpejtësi transferimi prej 80 Mbit/s.

Në të ardhmen, klientët e shërbimit bazik do të mund të zgjedhin midis qasjes së mëparshme në internet me shpejtësi shkarkimi dhe ngarkimi 10 Mbit ose 1 Mbit për sekondë dhe qasjes së re në internet prej 80 ose 8 Mbit/s, shkruan Këshilli Federal në një komunikatë zyrtare.

Nga kjo do të përfitojnë ata që jetojnë në zona ku nuk ka oferta përkatëse në treg.

Është vendosur gjithashtu një kufi çmimi. Qasja më e shpejtë në internet duhet të kushtojë maksimumi 60 franga në muaj.

Mësime nga Pandemia e Koronës

Sipas Këshillit Federal, qasja në shërbime të besueshme dhe efikase me brez të gjerë është thelbësore për të gjitha pjesët e popullsisë në të gjitha pjesët e vendit. Pandemia e Covid 19 e bëri të qartë këtë, përcjell albinfo.ch. Me rishikimin e urdhëresës për shërbimet e telekomunikacionit, oferta do tu përshtatet nevojave sociale dhe ekonomike si dhe gjendjes së teknologjisë.

Swisscom aktualisht mban licencën e shërbimit bazë, e cila skadon në fund të vitit 2023. Komisioni Federal i Komunikimeve (Comcom), i cili është përgjegjës për dhënien e licencës së shërbimit universal, tani mund të fillojë dhënien e licencës së ardhshme nga viti 2024.

 

---