Zvicra financon projektin për ujësjellës për 10 fshatra të Skenderajt

Sot është bërë inaugurimi i sistemit të ujësjellësit për 10 fshatra të komunës së Skenderajt, nga i cili do të përfitojnë mbi 11 mijë banorë, i financuar nga Qeveria zvicerane.

Ambasadori i Zvicrës në Kosovë, Jean-Hubert Lebettha, se ky bashkëpunim është bërë mes Qeverisë së Zvicrës dhe Kosovës dhe se është një aspekt mjaft i rëndësishëm i punës së dy vendeve, përcjell albinfo.ch.

Ai u shpreh i kënaqur që Zvicra ka mundur të mbështesë këtë projekt dhe do të vazhdojë mbështetjen në sfidat në vazhdim.

Kryetari i Komunës së Skenderajt, Bekim Jashari, ka thënë se ky projekt është shumë i rëndësishëm dhe i nevojshëm për banorët e fshatrave të Skenderajt.

“Qasjen në ujë të pijshëmm, të pastër dhe të sigurt, përfitojnë 11.080 banorë të këtyre fshatrave, me rrjet prej 128 km, 3 rezervuare dhe 1 stacion të pompimit. Vlera e këtij projekti është 1 milion e 230.000 euro. Falë bashkëpunimit me Ministrinë e Mjedisit dhe Planifikimit Hapësinor kemi arritur t’i sigurojmë mjetet edhe për lidhjet individuale me rreth 200.000 euro, që ky sistem të menaxhohet në mënyrën më të mirë të mundshme nga Kompania Rajonale e Ujësjellësit “Mitrovica”. Se vërtet sot është ditë e lumtur për banorët e Skenderajt, kjo nuk ka dyshim”, u shpreh ai.