Tregtarët në Zvicër duhet të kenë mundësi të kuptojnë më qartë tarifat që paguajnë për transaksionet pa para të gatshme. Për këtë arsye, Këshilli Federal ka nisur të mërkurën një konsultim për ndryshimin e Ligjit kundër Konkurrencës së Pandershme.
Kur konsumatorët paguajnë përmes aplikacionit TWINT ose me kartela bankare Visa dhe Mastercard, tregtarët detyrohen të paguajnë tarifa për shërbimet e ofruara. Megjithatë, për pronarët e dyqaneve dhe restoranteve, mënyra e llogaritjes së këtyre tarifave nuk është gjithmonë e qartë.
Kjo e vështirëson krahasimin e shërbimeve të ndryshme dhe lidhjen e kontratave duke pasur informacion të plotë për kostot.
Ofruesit do të detyrohen t’i paraqesin qartë tarifat
Çështja është ngritur edhe në Parlamentin zviceran, i cili vitin e kaluar i kërkoi Këshillit Federal të ndërmarrë masa për rritjen e transparencës. Tashmë, qeveria propozon ndryshimin e legjislacionit ekzistues.
Sipas propozimit, ofruesit e shërbimeve të pagesave për tregtarët, përfshirë Visa, Mastercard dhe TWINT, do të duhet t’i paraqesin qartë tarifat e ndryshme që aplikohen për çdo transaksion.
Këtu përfshihen tarifa e shërbimit që paguan tregtari, tarifa e shkëmbimit ndërmjet institucioneve financiare (interchange fee) dhe tarifa e skemës së pagesave (scheme fee), e cila caktohet nga ofruesi i sistemit të pagesave.
Këshilli Federal: Transparenca e çmimit të përgjithshëm është e mjaftueshme
Sipas Këshillit Federal, paraqitja transparente e çmimit të përgjithshëm të një transaksioni është e mjaftueshme për të siguruar konkurrencë efektive në treg.
Qeveria vlerëson se kërkesat shtesë për transparencë do të krijonin barrë administrative, pa sjellë përfitime të dëshmuara qartë në aspektin e konkurrencës.
Ndryshimet e propozuara synojnë t’u mundësojnë tregtarëve të kuptojnë më mirë kostot e pagesave elektronike dhe të krahasojnë ofertat e ofruesve të ndryshëm përpara se të lidhin kontrata.
