Zvicra mbështet shkollat profesionale në Bursën e Punësimit

Zvicerani, Guido Beltrani ka thënë se dihet tashmë se sa e vështirë është për të rinjtë kosovarë të gjejnë një vend pune

Zyra Zvicerane për Bashkëpunim në Kosovë ka mbështetur nxënësit që kanë kryer shkollat profesionale për rajonin e Prishtinës në Bursën e Punësimit, që për të tretën herën po mbahen nën organizim të Qeverisë së Kosovës.

　

Zëvendësdrejtori i Zyrës Zvicerane për Bashkëpunim në Kosovë, Guido Beltrani ka thënë se dihet tashmë se sa e vështirë është për të rinjtë kosovarë të gjejnë një vend pune, por, sipas tij, punësimi në Kosovë është një prej shqetësimeve më të mëdha.

　

“Të rinjtë kosovarë ende e kanë të vështirë të gjejnë punë qoftë në bizneset private dhe në ato shtetërore”, ka thënë zëvendësdrejtori Beltrani.

　

Në Bursën e Punësimit “Kosova 2011”, po marrin pjesë 100 kompani të sektorëve të ndryshëm, po ashtu dhe shkollat e ndryshme të agrobiznesit, shkolla profesionale të ndryshme të ndërtimtarisë për të tentuar që të kenë edhe trajnime nëpër shkolla.

　

Edhe pse kompanitë pjesëmarrëse në këtë bursë kanë ofruar 281 vende pune për punëkërkuesit, si duket kjo është shifër tejet e vogël, krahasuar me numrin shumë të madh të atyre, që ishin të pranishëm dhe kërkonin punë.

　

Organizatorët e kësaj ngjarje u shprehën optimistë se hapja e bursës do të sjellë rezultate në zbutjen e papunësisë. Po ashtu u bënë thirrje kompanive të pranishme për një patriotizëm ekonomik.

　

Ministri i Punës dhe Mirëqenies Sociale, Nenad Rashiq ka thënë se e ardhmja nuk do të jetë e lehtë në këtë drejtim, por, sipas tij, duhet që së bashku të punohet më shumë që të zbutet papunësia.

　

---