Zvicra mund të ndalojë barin e syve “Ala Octa”

Është raportuar se ky medikament ka shkaktuar verbimin e përdoruesve të tij në disa raste në Francë dhe në Spanjë

Veprimi i një medikamenti që shërben për trajtimin e syve (pika të syrit) me emrin “Ala Octa” ka ngjallur shqetësim në disa vende perëndimore, përfshirë dhe Zvicrën. Është raportuar se ky medikament ka shkaktuar verbimin e përdoruesve të tij në disa raste në Francë dhe në Spanjë. Ata kanë përdorur këtë ilaç për kurim pas operacioneve të syve.

Për këtë arsye, instituti zviceran i barnave “Swissmedic” është duke e shqyrtuar mundësinë e ndalimit të përdorimit të “Ala Octa”s në Zvicër.

Ndërkohë edhe nga Zvicra është paraqitur një rast i dëmtimit të rëndë të shikimit si pasojë përcjellëse e përdorimit të medikamentit në fjalë, ka konfirmuar Swissmedic për radion SRF.

Ndërsa firma prodhuese ka iniciuar një aksion për kthimin e këtij medikamenti nga blerësit dhe farmacitë. Por ajo këmbëngul se provat laboratorike kanë dëshmuar rregullsinë e produktit. Sipas saj, pasojat e dëmshme në rastet e përmendura mund të kenë adhur nga përdorimi i gabuar i barit.