Zvicra ndër vendet më të dobëta në Evropë në luftën kundër duhanit

pixabay

Zvicra është renditur pothuajse në fund të listës evropiane për përpjekjet kundër pirjes së duhanit, duke zënë vendin e 36-të nga gjithsej 37 shtete të vlerësuara. Këtë e bëri të ditur të mërkurën Shoqata Zvicerane për Parandalimin e Duhanit.

Sipas raportit më të fundit evropian, Zvicra renditet pranë vendeve të Evropës Lindore, Italisë dhe shteteve të Ballkanit. Vetëm Bosnja dhe Hercegovina ka performancë më të dobët. Në krye të listës gjenden Irlanda, Mbretëria e Bashkuar dhe Holanda.

Nga shtetet fqinje të Zvicrës, Franca renditet në vendin e katërt, ndërsa Austria në vendin e 22-të dhe Gjermania në të 25-in.

Raporti evidenton mangësi të mëdha në ndalimin e reklamave të duhanit, mbrojtjen nga ndikimi i industrisë së duhanit, rregullimin e produkteve të reja me nikotinë dhe masat parandaluese. Gjithashtu, Zvicra mbetet i vetmi shtet i vlerësuar që ende nuk ka ratifikuar Konventën Kornizë të Organizatës Botërore të Shëndetësisë për Kontrollin e Duhanit.

Sipas raportit, pavarësisht disa ndryshimeve të fundit ligjore, Zvicra vazhdon të miratojë “ligje me boshllëqe të konsiderueshme” dhe me përjashtime në favor të industrisë së duhanit.

Shoqata Zvicerane për Parandalimin e Duhanit e cilësoi këtë renditje si një “alarm serioz politik”, duke kërkuar masa të forta, përfshirë ndalimin e plotë të reklamimit të duhanit, rregullim më të ashpër të produkteve të reja me nikotinë, rritje të ndjeshme të çmimeve të duhanit, forcim masiv të masave parandaluese dhe ratifikimin e menjëhershëm të konventës së OBSH-së.

Ndërkohë, Organizata Botërore e Shëndetësisë ka kritikuar vazhdimisht Zvicrën për veprimet e pamjaftueshme në luftën kundër duhanit, veçanërisht te të rinjtë. Sipas të dhënave, rreth një e treta e të rinjve zviceranë nga mosha 15 deri në 25 vjeç konsumojnë duhan.