Zvicra ndihmoi ndërtimin e ujësjellësit për gjashtë fshatra të Vitisë

Projekti si tërësi kap vlerën 527 mijë euro, ndërsa qeveria zvicerane në këtë shumë participon me 342 mijë euro

Gjashtë fshatra të komunës së Vitisë do të bëhen me ujësjellës falë mbështetjes së Qeverisë së Zvicrës dhe me participim të komunës dhe banorëve.

　

Sllatina e Epërme, Sllatina e Poshtme, Sadovina e Jerlive, Sadovina e Çerkezëve, Tërsteniku dhe Vërbani janë fshatra që kanë përfituar nga ky projekt i përbashkët, që kap vlerën 527 mijë euro, ndërsa qeveria zvicerane në këtë shumë participon me 342 mijë euro.

　

Astrit Vokshi, drejtor i CDI-së, organizatë kjo që jetëson projektet e qeverisë zvicerane dhe austriake për infrastrukturë, ka thënë se në fazën e katërt të këtyre projekteve komuna e Vitisë është përzgjedhur në mesin e gjashtë komunave të Kosovës.

　

“Qeveria zvicerane për fazën e katërt të projekteve ka ndarë 930 mijë euro për investime në të gjitha projektet, ndërkohë që për komunën e Vitisë janë paraparë 342 mijë euro apo 65 për qind e shumës së tërësishme të projektit për ujësjellës në të gjashtë fshatrat e kësaj komune”, ka thënë Vokshi.

　

Kryetari i Vitisë, Nexhmedin Arifi ka thënë se Komuna është e gatshme të mbështesë këtë iniciativë dhe të kryejë çdo angazhim që i takon autoriteteve komunale, duke theksuar se　 më këtë rast do të formojë një grup punues dhe të caktojë përfaqësuesit përgjegjës për mbikëqyrjen e projektit.

　

Përfaqësuesi i Zyrës për zhvillim të qeverisë zvicerane në Kosovë, Guido Beltroni ka thënë se prej vitit 2000, Zvicra ka financuar rreth 50 projekte të ujësjellësve nëpër lokalitete të ndryshme në Kosovë.

　

　

　

---