Zvicra ndihmon Kosovën në luftimin e krimit dhe korrupsionit

Shefi kosovar i akuzës, Aleksandër Lumezi ka marrë mbështetje nga Zvicra në luftimin e krimit dhe korrupsionit

Kryeprokurori i Shtetit të Kosovës, Aleksandër Lumezi falënderoi shtetin e Zvicrës për ndihmën e madhe që i ka dhënë përmirësimit dhe zhvillimit të sistemit të drejtësisë, nëpërmjet ndihmave në kuadër të UNDP-së. Me ndihmat helvetike është avancuar dukshëm sistemit të drejtësisë në Kosovë, e në veçanti efikasitetit të sistemit prokuroria.

Këto deklarata kryeprokurori i Shtetit i bëri sot në takim pune me ambasadorin e Zvicrës në Prishtinë, Jean Hubert Lebet, si dhe përfaqësuesin e Korporatës Zvicerane me seli në Prishtinë, Patrick Ettienne.

Fillimisht Lumezi e falënderoi ambasadorin Lebet për mbështetjen e vazhdueshme që shteti zviceran është duke e dhënë për avancimin e sistemit të drejtësisë në Kosovë, e në veçanti për rritjen e efikasitetit të sistemit prokurorial, konkretisht përmes projektit zviceran, për zhvillim dhe bashkëpunim, i cili projekt implementohet në kuadër të UNDP-së e që mbështet nga agjencioni Danez për zhvillim ndërkombëtar.

Lumezi theksoi se përmes këtij projekti kanë përfituar edhe institucionet zbatuese të ligjit, konkretisht edhe sistemi prokurorial në fushën e ngritjes së kapaciteteve profesionale për ndjekjen, hulumtimin dhe sanksionimin e veprave që ndërlidhen me korrupsionin.

Gjatë këtij takimi, kryeprokurori i Shtetit, Aleksandër Lumezi ka njoftuar ambasadorin Lebet se sfidë kryesore mbetet luftimi i korrupsionit, krimit të organizuar, krimeve ekonomike, terrorizmit dhe krimeve të luftës, si dhe bashkëpunim në mes Prokurorit të Shtetit dhe institucioneve tjera të zbatimit të ligjit, për koordinim të veprimeve për luftimin e këtyre veprave penale.

Ndër të tjera gjatë këtij takimi, kryeprokurori Lumezi dhe ambasadori Lebet kanë diskutuar edhe për ngritjen e kapaciteteve profesionale në sistemin prokurorial lidhur me kryerjen e ekspertizave financiare, ndjekjen e trajnimeve në fushën ekonomiko-financiare, krimeve kibernetike dhe korrupsionit, si dhe ndjekjen e trajnimeve në fushën e bashkëpunimit ndërinstitucional.

Ndërkaq, ambasadori zviceran në Prishtinë, Jean Hubert Lebet i premtoi kryeprokurorit Lumezi mbështetjen e tij dhe të shtetit Zviceran në avancimin e bashkëpunimit në të gjitha çështjet që mund të bashkëpunojnë sistemet prokuroriale të vendit tonë dhe Zvicrës, përmes ambasadës zvicerane në Prishtinë.