Zvicra ndihmon shëndetësinë kosovare

Ministri i Shëndetësisë i Kosovës, Uran Ismaili, u ka dorëzuar kryetarëve dhe përfaqësuesit të 38 komunave të Kosovës raportin kombëtar “Cilësia e kujdesit”, i mbështetur nga AQH, i cili është mbështetur nga shteti i Zvicrës. Në një tryezë me kryetarët e komunave Ismaili tha ky projekt ka rëndësi të veçantë, ngase përpos që u jep kryetarëve të komunave një pasqyrë fillestare të gjendjes në terren, i ofron mundësi edhe Ministrisë së Shëndetësisë që t’i orientojë fondet aty ku është nevoja më e madhe.  

Studimi ka vlerësuar infrastrukturën, standardet e higjienës dhe sigurisë, pajisjet mjekësore esenciale ekzistuese, si dhe kënaqshmerinë e pacientit. Ministri Ismaili tha se në kuadër të planit të punës për vitin 2019 në kujdesin primar ka pasur disa aktivitete shumë të rëndësishme ndër to e përmendi hartimin e strategjisë për kujdesin primar shëndetësor, i cili do të fillojë pas këtij vlerësimi të AQH-së. Ambasadori i Zvicrës, Jean-Hubert Lebet, foli për rëndësinë e këtij projekti dhe forcimin e kujdesit parësor shëndetësor. “Kjo është diçka e mirë që të shihet kjo punë e realizuar dhe të ketë një përcjellje të aktiviteteve sipas planit”, përcjell albinfo.ch.

Kujdesi parësor shëndetësor ka potencial për t’u zhvilluar, prandaj duhet të bashkojmë forcat që të punojmë në këtë drejtim. Jemi të lumtur që po ndihmojmë në Kosovë, pasi që jemi duke bërë diçka speciale për momentin”, ka thënë ai.