Zvicra nuk ua njeh romëve statusin e pakicës kombëtare

Sipas qeverisë, romët nuk i plotësojnë të gjitha kushtet e nevojshme për t`iu njohur zyrtarisht statusi i pakicës kombëtare në Zvicër

Këshilli Federal i Zvicrës nuk i konsideron romët si pakicë kombëtare në kuptimin që e përcakton Konventa e Këshillit të Evropës, shkruan srf.ch. Sipas tij, romët nuk i plotësojnë të gjitha kushtet e nevojshme për t`iu njohur zyrtarisht statusi i pakicës kombëtare në Zvicër.

Qeveria e vendit me këtë vendim ka hedhur poshtë kërkesën për njohje, të bërë nga dy organizata të këtij komuniteti, transmeton albinfo.ch. Sipas saj, në rastin e romëve mungon një lidhje e gjatë në kohë me Zvicrën. Por, Këshilli Federal në të njëjtën kohë thekson se romët janë pjesë e shoqërisë zvicerane dhe duhet të mbrohen nga racizmi e diskriminimi.

Nga ana tjetër, Shoqata e Popujve të Rrezikuar, ka kritikuar këtë vendim të Qeverisë së Zvicrës. Sipas saj, është e pakuptueshme që Zvicra të njohë komunitetin “Sinti” si pakicë kombëtare dhe të mos i njohë romët.