Zvicra, për shkak të virusit të ri, ndalon të gjitha hyrjet nga Britania e Madhe

Të gjithë njerëzit që kanë hyrë në Zvicër nga Britania e Madhe dhe Afrika e Jugut që nga 14 dhjetori 2020, duhet të vendosen në karantinë për dhjetë ditë

Pas zbulimit të variantit të ri, më ngjitës të koronavirusit në Britaninë e Madhe dhe Afrikën e Jugut, Këshilli Federal ka vendosur sot të marrë masa për të parandaluar përhapjen e mëtejshme të tij sa më shumë që të jetë e mundur, shkruan sda.ch.

Siç thuhet në një komunikatë të qeverisë, të gjithë njerëzit që kanë hyrë në Zvicër nga dy vendet e përmendura që nga 14 dhjetori 2020, duhet të vendosen në karantinë për dhjetë ditë.

Këshilli Federal ka vendosur gjithashtu për një ndalim të përgjithshëm të hyrjes për të gjithë të huajt që duan të hyjnë në Zvicër nga Britania e Madhe dhe Afrika e Jugut që nga sot, transmeton albinfo.ch. Kjo do të thotë që përjashtohen udhëtimet turistike nga këto vende në veçanti.

Takim urgjent i Këshillit Federal

Këshilli Federal ka zhvilluar sot një takim emergjenzt lidhur me virusin e ndryshuar të koronës që është shfaqur në Britaninë e Madhe, përcjell albinfo.ch. Këtë njoftim e ka dhënë sot për mediat zëdhënësi i Këshillit Federal, André Simonazzi .

Për shkak të virusit që ka pësuar mutacion, nuk ka pasur fluturime midis Zvicrës dhe Britanisë së Madhe që nga e hëna në mesnatë.

 

---