Zvicra po përballet me rënie të vazhdueshme të lindjeve

Ekspertët theksojnë se rënia e lindshmërisë nuk lidhet vetëm me faktorët ekonomikë

Numri i lindjeve në Zvicër ka rënë për të katërtin vit radhazi. Sipas të dhënave të fundit, gjatë vitit 2025 janë regjistruar rreth 78,200 lindje, ndërsa norma e fertilitetit ka zbritur në 1.28 fëmijë për grua, nga 1.54 sa ishte një dekadë më parë.

Ekspertët theksojnë se rënia e lindshmërisë nuk lidhet vetëm me faktorët ekonomikë.

Gjithnjë e më shumë të rinj po zgjedhin të mos kenë fëmijë, ndërsa ata që duan familje po e shtyjnë prindërimin për më vonë. Në vitin 2023, 17% e personave të moshës 20-29 vjeç deklaruan se nuk dëshironin të kishin fëmijë, krahasuar me vetëm 6% një dekadë më parë.

Një tjetër trend është rritja e moshës së nënave. Mosha mesatare e lindjes ka arritur në 32.5 vjet, ndër më të lartat në Evropë. Studiuesit vlerësojnë se shtyrja e prindërimit zvogëlon vitet e fertilitetit dhe rrit gjasat që planet për të pasur fëmijë të mos realizohen plotësisht.

Ndërkohë, edhe martesat po bëhen më të rralla. Në vitin 2025 u regjistruan rreth 35,900 martesa, një rënie prej 2.3% krahasuar me një vit më parë.

Demografët paralajmërojnë se, nëse trendet aktuale vazhdojnë, rritja natyrore e popullsisë zvicerane mund të ndalet në mesin e viteve 2030, duke e bërë emigracionin burimin kryesor të rritjes së popullsisë.

---