Zvicra, së shpejti me trena pa lokomotivistë

Linja e parë që pritet të bëjë një eksperiment të tillë do të jetë ajo në mes të St.Gallenit dhe Lucernit, e drejtuar nga kompania hekurudhore Südostbahn. Studimi paraprak për projektin pilot është tashmë i gatshëm

Ilustrim

Gjatë dy deri tri viteve të ardhshme në rrjetin hekurudhor të Zvicrës do të bëhet një provë me trena që do të lëvizin pa pasur nevojë të drejtohen nga lokomotivistët.

Sipas hulumtimeve të bëra nga radio SRF linja e parë që pritet të bëjë një eksperiment të tillë do të jetë ajo në mes të St.Gallenit dhe Lucernit, e drejtuar nga kompania hekurudhore Südostbahn. Por drejtori i ndërmarrjes së përmendur nuk ka dhënë informacione plotësuese se ku do të ndodhë kjo më saktësisht, transmeton albinfo.ch Por ai ka thënë se studimi paraprak për projektin pilot është tashmë i gatshëm.

Mirëpo leja që duhet ta japë Zyra Federale për Komunikacion ende nuk është dhënë. Deri më tash të vetmet linja në Zvicër që funksionojnë pa lokomotivist (shofer) janë metroja e Lozanës (e vetmja në Zvicër) dhe hekurudha interne, e shkurtë brenda aeroportit të Cyrihut, në Kloten. Por të dyja këto konsiderohen si sisteme të mbyllura hekurudhore në të cilat nuk ka mundësi të qaset asnjë tren ose mjet tjetër.

Ndërkohë që projekti i përmendur pilot ashtu si dhe përpjekje tjera në këtë drejtim nuk mungojnë, në Ndërmarjen Federale të Hekurudhave (SBB/CFF) nuk duan të flasin rreth kësaj. Nga ana tjetër, ekspertët e komunikacionit thonë se profesioni i lokomotivistit që tash mund të konsiderohet si profesion që është para vdekjes.