Zvicra shqyrton tarifë për kalimin në Gotthard për të ulur bllokimet e trafikut

TCS Foto nga arkiva

Kolonat e gjata të automjeteve në zonën e Gotthardit kanë nxitur debat për vendosjen e një tarife për automjetet tranzit. Gjatë fundjavave të fundit, në këtë aks janë regjistruar deri në 20 kilometra kolona dhe pritje prej rreth tre orësh e gjysmë, duke shkaktuar edhe trafik të devijuar nëpër fshatrat e kantonit Uri.

Banorët lokalë ankohen se rritja e trafikut po ndikon në jetën e përditshme, ndërsa autoritetet po kërkojnë zgjidhje për menaxhimin e fluksit të madh të automjeteve.

Parlamenti zviceran i ka kërkuar Qeverisë Federale të shqyrtojë mundësinë e një tarife për automjetet që kalojnë Gotthardin pa qëndrim të gjatë në Zvicër. Mbështetësit e masës argumentojnë se pjesa më e madhe e trafikut vjen nga vendet fqinje dhe se një tarifë mund të ndihmojë në uljen e ngarkesës në rrugë.

Eksperti i transportit Kay Axhausen thotë se një pagesë e tillë mund të ndikojë në sjelljen e udhëtarëve, por paralajmëron se ajo do të ishte më efektive nëse do të zbatohej për të gjithë drejtuesit, jo vetëm për të huajt.

Qeveria zvicerane pritet të hartojë një propozim për këtë çështje, por zbatimi i një tarife të tillë mund të marrë ende kohë.