Zvicra shtyn lançimin e identitetit elektronik (e-ID)

Autoritetet kërkojnë masa shtesë sigurie për shkak të zhvillimeve në inteligjencën artificiale dhe rrezikut nga “deepfake”-t.

Zvicra ka shtyrë zyrtarisht prezantimin e identitetit elektronik (e-ID), i cili ishte planifikuar të hynte në përdorim në dhjetor të vitit 2026, përcjell albinfo.ch.

Sipas njoftimit të bërë të martën nga Zyra Federale e Drejtësisë (FOJ), projekti do të vonohet për shkak të nevojës për masa shtesë sigurie, të diktuara nga zhvillimet e fundit në fushën e inteligjencës artificiale.

Autoritetet zvicerane theksuan se përmirësimet teknike synojnë të forcojnë mbrojtjen e të dhënave, ta bëjnë më të vështirë instalimin e programeve keqdashëse (malware) në pajisje dhe të përmirësojnë zbulimin e përmbajtjeve të rreme të krijuara me inteligjencë artificiale, të njohura si deepfake.

“Siguria është më e rëndësishme sesa respektimi i afatit fillestar”, theksoi Zyra Federale e Drejtësisë.

Një datë e re për lançimin e e-ID do të bëhet publike në një fazë të mëvonshme. /Albinfo.ch

---