Zvicra sot: Përmbledhje e lajmeve të fundit të së hënës

Gjykata vendos se borxhi nuk e pengon natyralizimin zviceran; do të ulen çmimet e energjisë elektrike; dhe më shumë lajme që “përmbledhin” Zvicrën këtë të hënë.

Gjeneva do të zgjerojë shërbimet e saj të transportit publik

Parlamenti i Gjenevës miratoi planin e veprimit të qeverisë kantonale 2024-2028, i cili parashikon një rritje prej 29 për qind në shërbimet e transportit publik.

Konkretisht, parashikon më shumë tramvaje, përfshirë ato ndërkufitare, si dhe elektrifikim të mëtejshëm të autobusëve.

Kapaciteti i trenit Léman Express, i cili mbulon komunitetet në Vaud, Gjenevë dhe Francën fqinje, do të forcohet gjithashtu.

Ky lajm vjen vetëm disa ditë pasi zyrtarët e Gjenevës njoftuan se do të përdorin tepricën buxhetore prej 1.4 milionë frangash për të ofruar transport falas për personat deri në 24 vjeç, përveç uljes së taksave.

Vendos gjykata, borxhi nuk mund të pengojë shtetësinë zvicerane

Megjithëse kantonet kanë refuzuar të natyralizojnë të huajt që janë subjekt i procedurave të mbledhjes së borxheve, një gjykatë në Aargau ka vendosur, në një çështje që ka zgjatur me vite, se mohimi i shtetësisë në rrethana të tilla shkel të drejtat e aplikantëve, shkruan thelocal.

Ky vendim erdhi pasi një kosovare që jeton prej 32 vjetësh në Zvicër iu refuzua disa herë kërkesa për natyralizim, për shkak të borxhit.

Gjykata administrative, megjithatë, pranoi ankesën e saj kundër këtij vendimi, duke e cilësuar refuzimin për shkak të ekzekutimit të borxhit, është antikushtetues.

Çmimi i energjisë elektrike do të ulet vitin e ardhshëm

Sipas Swissgrid, e cila është përgjegjëse për transmetimin e energjisë elektrike brenda Zvicrës, çmimet do të ulen në vitin 2025.

“Një familje me një konsum vjetor prej 4,500 kWh do të paguajë mesatarisht 77 franga në vitin 2025 krahasuar me 92 franga në vitin 2024”, tha kompania.

Rënia do të vijë si një lehtësim disi për konsumatorët zviceranë, të cilët janë goditur me një rritje çmimi prej 18 për qind për vitin 2024.

Lepurushët më miqësorë ndaj mjedisit të Pashkëve

Një firmë konsulence zvicerane, ESU Services, ka vlerësuar gjurmën e karbonit të këtij produkti, duke analizuar tre lepurushë 100 gr, secili prej çokollate të bardhë, qumështi dhe të zezë.

Faktori vendimtar në çokollatë është përmbajtja e qumështit pluhur dhe gjalpë kakao, sipas Niels Jungbluth, drejtor i ESU Services.

Studimi shqyrtoi sasinë e gazeve serrë që dëmtojnë klimën, si CO2, të prodhuara në të gjithë zinxhirin e prodhimit dhe furnizimit të përbërësve. Është marrë parasysh i gjithë ndikimi, që nga kultivimi i përbërësve deri te prodhimi i çokollatës, përmes shitjes dhe transportit, si dhe asgjësimi i ambalazhit.

Analiza zbuloi se lepurushi “i bardhë” ndot mjedisin me gazra të dëmshëm serë të barabartë me atë të një udhëtimi 1.7 km me makinë. Lepuri i qumështit ka një ndikim të barabartë me drejtimin e një makine për 1.5 km. Dëmi i shkaktuar nga më i errëti, i cili nuk përmban qumësht pluhur dhe shumë pak gjalpë kakao, është i barabartë me drejtimin 0.9 km./albinfo.ch

 

---