Zyrtare: Pezullohet greva, mësimi fillon të hënën

Orët e humbura të mësimit nuk do të kompensohen

Kjo është bërë e ditur në një konferencë për media të mbajtur sot gjatë ditës.

Kësisoj, mësimi në shkolla do të fillojë të hënën.

E gjatë ditës së djeshme, SBASHK ka treguar se pro pezullimi të përkohshëm të grevës janë 54.8 %  e anëtarësisë.

Vlen të theksohet se greva e mësimdhënësve po pezullohet pavarësisht mosrealizimit të kërkesës kryesore të tyre, 100 euro shtesë deri në miratimin e Ligjit të pagave.

Kreu i Sindikatës së Arsimit, Rrahman Jasharaj, në një konferencë për media sot ka njoftuar se e kanë pezulluar grevën dhe se mësimi nis të hënën në shkolla.

Por, ai tha se Qeveria Kurti s’duhet ta shohë këtë si një fitore të saj, por të marrë mësim meqë pezullimin e saj e bënë për hir të fëmijëve.

“Uroj që Qeveria Kurti të ketë nxjerrë mësime dhe të mos dalë tash e të ndihet triumfale. Sindikatën e Arsimit, shërbyesit civilë, por edhe BSPK-në, që ka një histori të lavdishme nga vitet e 90-ta, s’ka mundur kush ta gjunjëzojë, as kjo qeveri as të tjerat  që do të vijnë”.

Jasharaj ka thënë se kanë qenë kategorikë ndaj grevës, por se për shkak të linçimeve dhe fyerjeve të rënda kanë hequr dorë nga greva.

Ai shtoi se do të vazhdojnë komunikimin me Qeverinë kërkesat e anëtarësisë të gjejnë forma të tjera në përballje me Qeverinë.

---