Zyrtarisht: Zvicra vendos kontrolle kufitare gjatë samitit të G7 në Francë

Masat e përkohshme të sigurisë prekin rajonin e Gjenevës dhe Lozanës për shkak të rreziqeve të mundshme

Qeveria e Zvicrës ka njoftuar vendosjen e kontrolleve të përkohshme në kufi gjatë samitit të G7, i cili do të mbahet nga 15 deri më 17 qershor në qytetin Évian të Francës, përcjell albinfo.ch.

Duke qenë se Évian ndodhet vetëm rreth 45 kilometra larg Gjenevës, Këshilli Federal ka vendosur që kontrollet kufitare mes Zvicrës dhe Francës të zbatohen nga 10 deri më 19 qershor.

Autoritetet zvicerane theksojnë se, edhe pse samiti zhvillohet në territorin francez, rajoni i Gjenevës dhe Lozanës, si dhe i gjithë zona e Liqenit të Gjenevës, mund të përballet me rreziqe sigurie.

Sipas Këshillit Federal, masat janë të domosdoshme duke marrë parasysh përvojat e mëparshme, ku samitet e G7 janë shoqëruar me përleshje të dhunshme, sabotime dhe dëmtime të pronës.

Kontrollet synojnë të rrisin sigurinë në rajon gjatë periudhës së samitit dhe të parandalojnë çdo incident të mundshëm./Albinfo.ch

---