1 milion njerëz të prekur nga rritja e qirasë në Zvicër

Përafërsisht një milion njerëz në Zvicër paguajnë 30% të pagave për qira e rritja e mëtutjeshme do t’i prekë më së shumti ata që kanë të ardhura më të ulëta. Në Zvicër, 60 për qind e popullsisë janë qiramarrës, rreth 20 për qind vuajnë nga tarifat e tepërta të qirave. Llogaritet se  një milion persona me të ardhura të ulëta marrin një pagë bruto prej më pak se 5000 franga në muaj dhe më shumë se një e treta e kësaj tash shkon në qira, shkruan 20minuten, përcjellë Albinfo.ch.

Sipas Caritas-it, disa shpenzojnë më shumë se 50 për qind të pagave të tyre për qira edhe pse rregulli i përgjithshëm thotë se qiraja nuk duhet të kalojë një të tretën e të ardhurave.

Situata duket se do të përkeqësohet pas qershorit kur pritet të rritet edhe norma e interesit në referencë. Për herë të parë pritet një rritje prej 0.25 pikë përqindjeje dhe do të ndikojë edhe në qiratë ekzistuese, raporton 20minuten, përcjell Albinfo.ch.

Përpos rritjes në verë edhe në vjeshtë ekspertët presin rritje të tjera të çmimeve. Rritja në qira do të jetë 4% dhe rritja në shërbime do të jetë 40% paralajmërojnë ekspertët.

Shoqata Zviceriane e Qiramarrësve ka thënë që personat me të ardhura të ulëta penalizohen dyfish, sepse zakonisht jetojnë në ndërtesa të vjetra që ngrohen kryesisht me gaz ose naftë dhe janë të izoluara keq. Kështu janë duke kërkuar strehim të përballueshëm. “Komunat nuk janë të interesuara për banesa të përballueshme, sepse atëherë hyjnë njerëz me të ardhura të ulëta ose përfitues të mirëqenies sociale, të cilët vështirë se sjellin taksa për komunitetet, por më tepër kosto shtesë”, thotë Lorenz Bertsch nga Caritas, shkruan 20minuten, përcjellë Albinfo.ch.